LV RU EN

Ludza - senākā Latvijas pilsēta
Pirmdiena, 2021. gada 12. aprīlis
Jūlijs, Ainis
Ludza
Mostly clear
7°C
 
A A A

Koč kas čosnys aba klusiņkuos muokslys dīnas Ludzā

apisha 2 (2)Gods riņdžā. Muokslys dīnas, kas kotru pavasari saplaukst Latvejī, niu taidys klusiņkys kai vyzbuļs piec solnu, jo daudzi lelu nūtikšonu, kureimuos puorsyt ar nūzeimeibu, spāku, intensitati, ītekmi iz cylvāka sirdi i apleicīni. Puorskaitūt viņ viersrokstus škārsteiklā, avīzēs – naudys moka turātuoju cīnis ar na sovom rūkom i dzeiveibom Ukrainā, biegļu laivys Vydusjiurys krostā i dybynā, lidmašynys pilots pašnuovnīks, Latvejis prezidenturys pusgods, pasauļa čempionats hokejā, Raiņa jubilejis gods. Koč kas nūteik pasaulī, bet personeigi naskar i jiutu viļneits nasasakustynova sirdī. Tepat rādā ir lelu veiru gūda dīnas – gora gaismys siejejam Andryvam Jūrdžam palyktu 170 godu, breiveibys i taisneibys ceinietuojam Pīteram Miglinīkam – 165, goreidznīkam, izgleiteibys darbinīkam Nikodemam Rancānam – 145, muokslinīkam Juram Soikanam – 95, muokslys zynuotnīkam Juoņam Pujātam – 90, dzejnīkam, kulturys darbinīkam Ontonam Kūkojam – 75. I tys var naskart, ja viņ pats sevi nadasīņ tautys goram ar dzeiveibas dzeislu. Tyvumā i īškā asūt nasatiemiet īspiejamūs atspulgus i nūspīdumus sevkura dvieselī.
Vaicojūt īdvasmu paruodis “Koč kas čosnys” vizualijam tālam, pacielem vacuos avīzis, kas izdūtys pyrms 100 godu – 1915.goda aprelī. Tys beja kara laiks, kureimīs grudynuoja vieļ patuoli. Draudi beja viņ apsūliejumā. Dūma par Latveji kai vīnuotu vaļsti koč kur ideju pasaulī. Tīši 1915.godā latvīšu muokslys veicynuošonys bīdreiba publicej pyrmū reklamu žurnalā “Varavīksne” par izstuodi puordūtovi latvīšu-latiņu burtim. Viņ symta godu. A kas niu? Vuicamīs raksteit latgalīšu mielī, lai viesteitu par muokslys lītom.
Pārnejīs gods beja īsuokums J.Soikana Ludzys muokslys školas pedagogu darbu paruožu viertenei, kas veļteitys pamatkruosai. 2014.gods – “Dzaltons ci jir, ci nav”. Niu 2015.gods, sorkons – “Koč kas čosnys”. 2016.gods – zyls. Taipoš jemom paleigā ceļazeimis. Sorkonīs, čosnīs – STOP zeime, voi ībraukt aizlīgts? Rūbeža, kuru navar puorkuopt, aiz kureimuos nikuo vaira nav? Voi rūbeža, kura paplašynoj pasauļa uztveršonas dziļumu i tuolumu? Voi tys ir koč kas čosnys, koč kas sorkons i šmuks? Kai vysod paruodis saturs ir nūslāpums leidz pošai atkluošonas šaļtei. Tiemiesim kūpā, kas nu tuo vysa saīs 2015.goda 15.majī 13:00 stuņdēs Ludzys mīsta pošvaļdeibys ākā Raiņa īlā 16.

Muokslinīku vuordā Vuorkaļu Sandra

P.S. Paļdis par padūmu Valentinam Lukaševičam izteiksmis spūdrynuošonā.

coloring.cool